Samfélagsábyrgð

Landsbankinn hefur markað sér stefnu í samfélagsábyrgð þar sem efnahags-, samfélags- og umhverfismálum er fléttað saman við starfshætti bankans. Stefnan miðar að því að stuðla að sjálfbærni í íslensku samfélagi, vera hreyfiafl og starfa eftir ábyrgum stjórnarháttum í rekstri bankans.

Landsbankinn hlýtur jafnlaunavottun

Baldur G. Jónsson, mannauðsstjóri Landsbankans og Bergþóra Sigurðardóttir, starfsþróunarstjóri hjá Landsbankanum.

 

Landsbankinn hefur hlotið jafnlaunavottun sem er staðfesting á því að jafnlaunakerfi bankans samræmist kröfum jafnlaunastaðalsins ÍST 85:2012. Meginmarkmið jafnlaunavottunar er að vinna gegn kynbundnum launamun og stuðla að jafnrétti kynjanna á vinnumarkaði.

Með innleiðingu jafnlaunastaðals hefur Landsbankinn komið sér upp stjórnunarkerfi sem tryggir að málsmeðferð og ákvarðanir í launamálum byggist á málefnalegum sjónarmiðum og feli ekki í sér kynbundna mismunun.

Jafnlaunavottun var lögfest í júní 2017 og fór Landsbankinn í gegnum vinnu við jafnlaunavottunina á árinu 2018. Lokaúttekt bankans fór fram í janúar og framkvæmdi BSI á Íslandi, faggild skoðunarstofa, úttektina. Hefur vottunin nú tekið gildi.

Baldur G. Jónsson, mannauðstjóri:

„Landsbankinn hefur um árabil lagt ríka áherslu á að konur og karlar sem starfa í bankanum hljóti jöfn laun fyrir jafn verðmæt störf og sömu starfstækifæri. Landsbankinn hefur í tvígang hlotið gullmerki Jafnlaunaúttektar PwC og innleiddi á síðasta ári Jafnréttisvísi Capacents. Það er ánægjulegt að bankinn hafi nú hlotið lögbundna jafnlaunavottun sem er góð viðbót við þá miklu vinnu sem þegar hefur farið fram í bankanum til að tryggja launajafnrétti.“

Nánar um jafnlaunavottun

Nánar um jafnréttismál í Landsbankanum


Samfélagsskýrsla Landsbankans

Samfélagsskýrsla Landsbankans fyrir árið 2018 er nú aðgengileg á vef bankans og kemur sem fyrr einungis út í vefútgáfu. Í skýrslunni er fjallað ítarlega um samfélagsábyrgð bankans og hvernig bankinn hugar að umhverfissjónarmiðum, félagslegum og efnahagslegum þáttum í starfsemi sinni.

Á árinu 2018 ákvað Landsbankinn að fylgja markvisst heimsmarkmiðum Sameinuðu þjóðanna með áherslu á þrjú markmið: jafnrétti kynjanna (nr. 5), góða atvinnu og hagvöxt (nr. 8) og ábyrga neyslu og framleiðslu (nr. 12). Einnig var ákveðið að fylgja nýjum viðmiðum um ábyrga bankastarfsemi, sem Umhverfisstofnun Sameinuðu þjóðanna og fjármálafyrirtæki víða um heim settu til að tengjast heimsmarkmiðunum.

Jafnréttismálin voru í brennidepli á árinu en bankinn innleiddi Jafnréttisvísi Capacent með þátttöku alls starfsfólks og vann að innleiðingu lögbundinnar jafnlaunavottunar sem nú hefur tekið gildi. Áhersla var lögð á innleiðingu á stefnu um ábyrgar fjárfestingar en samfélagsstefna bankans er mótuð á þann hátt að tryggt sé að hún sé hluti af kjarnastarfseminni, fjárfestingum og lánveitingum. Víðtækt samstarf og stuðningur bankans til að skapa fjölbreytt samfélag er einnig til umfjöllunar sem og breytingar í fjármálaumhverfinu, eðlisbreytingar í fjársvikatilraunum og áskoranir í mannauðsmálum og fleira.

Landsbankinn gefur árlega út samfélagsskýrslu þar sem viðmiðum Global Reporting Initiative (GRI) er fylgt. Á árinu 2018 hlaut bankinn viðurkenningu fyrir samfélagsskýrslu ársins þegar Festa, Stjórnvísi og Viðskiptaráð Íslands veittu viðurkenninguna í fyrsta sinn. Landsbankinn er virkur þátttakandi í starfi UN Global Compact, verkefni Sameinuðu þjóðanna um ábyrgar fjárfestingar (UN PRI), er stofnaðili að samtökum um ábyrgar fjárfestingar á Íslandi (IcelandSIF) sem og Festu, miðstöð um samfélagsábyrgð fyrirtækja.

Lesa samfélagsskýrslu Landsbankans 2018


Landsbankinn aðili að Jafnréttisvísi Capacent

Baldur G. Jónsson, mannauðsstjóri Landsbankans, Lilja. B Einarsdóttir, bankastjóri Landsbankans, Þórey Vilhjálmsdóttir, ráðgjafi hjá Capacent, Steingrímur Sigurgeirsson, ráðgjafi hjá Capacent.

 

Lilja Björk Einarsdóttir, bankastjóri Landsbankans, hefur tekið við viðurkenningu um að bankinn sé nú orðinn aðili að Jafnréttisvísi Capacent.

Jafnréttisvísirinn er stefnumótun og vitundarvakning á sviði jafnréttis þar sem staða jafnréttismála innan fyrirtækis eða stofnunar er metin með ítarlegri greiningavinnu. Í kjölfarið er unnið að breytingaverkefnum og markmiðasetningu til að bæta stöðu jafnréttismála og innleiða þau. Leitast er við að ná heildrænu sjónarhorni á jafnréttismál og eru lykilþættir sem horft er til menning, samskipti og vinnuumhverfi, stefna og skipulag, skipurit, laun og fyrirmyndir. Ekki síst er lögð áhersla á að fá upp á yfirborðið þá ómeðvituðu kynbundnu fordóma sem oft leynast í menningu, umhverfi og skipulagi fyrirtækja.

Samkomulag um að Landsbankinn tæki þátt í verkefninu var undirritað í febrúar og hefur verið unnið að því síðan, með þátttöku allra starfsmanna bankans, að greina stöðuna og móta breytingaverkefni til næstu ára.

Lilja Björk Einarsdóttir, bankastjóri Landsbankans:

„Í Landsbankanum, sem og í samfélaginu öllu, hefur að undanförnu orðið mikil vitundarvakning í jafnréttismálum. Með samstarfinu við Capacent og beitingu Jafnréttisvísins fáum við aðstoð við að greina stöðuna ítarlega, móta skýr markmið og vera almennt meðvitaðri í öllum samskiptum í þeim tilgangi að byggja upp gott starfsumhverfi og jákvæða og uppbyggilega fyrirtækjamenningu. Höfuðáherslan í jafnréttismálum hjá Landsbankanum síðustu ár hefur verið að tryggja körlum og konum jöfn tækifæri og jöfn laun fyrir jafn verðmæt störf. Við höfum náð góðum árangri en Jafnréttisvísirinn hjálpar okkur að gera enn betur.“

Þórey Vilhjálmsdóttir, ráðgjafi hjá Capacent:

„Það hefur verið stórkostlegt að vinna með Landsbankanum að þessu verkefni og finna þann kraft og þann vilja sem er jafnt hjá stjórnendum sem starfsmönnum að koma Landsbankanum í fremstu röð á sviði jafnréttismála. Nær allir þeir þúsund einstaklingar sem starfa hjá bankanum hafa verið virkjaðir í vinnunni á einhverju stigi og hafa tekið þátt í að móta þau breytingaverkefni sem nú verður ráðist í.“


Úthlutun úr Gleðigöngupotti Hinsegin daga og Landsbankans

Opið var fyrir umsóknir um styrki úr Gleðigöngupotti Hinsegin daga og Landsbankans dagana 8. maí til 11. júní og hefur dómnefnd, skipuð af stjórn Hinsegin daga, verið að störfum frá þeim degi.

Niðurstöður dómnefndar liggja nú fyrir og eru styrkveitingar ársins sem hér segir:

  • Hinsegin félagsmiðstöð S78 – UngliðarS78: 200.000 kr.
  • Q – félag hinsegin stúdenta: 200.000 kr.
  • Hinsegin kórinn: 200.000 kr.
  • Intersex Ísland: 190.000 kr.
  • Það er þjóðlegt að vera hýr: 170.000 kr.
  • Drag-Súgur: 150.000 kr.
  • Óstofnað tví- og pankynhneigt félag Íslands: 150.000 kr.
  • BDSM á Íslandi: 100.000 kr.
  • House of Strike: 100.000 kr
  • Trans Ísland: 80.000 kr.

Samþykkt var að veita samtals styrki fyrir allt að 1.540.000 kr. en til viðbótar við 1.500.000 króna framlag Landsbankans hafði dómnefnd til ráðstöfunar 220.000 kr. sem ekki gengu út árið 2017. Dómnefnd heldur því eftir 180.000 krónum sem heimilt verður að nýta til veitingu hvatningarverðlauna ársins 2018.

Dómnefnd ársins skipuðu þau Gunnlaugur Bragi Björnsson – formaður Hinsegin daga, Karen Ósk Magnúsdóttir – gjaldkeri Hinsegin daga, Eva Jóa – f.h. göngustjórnar Gleðigöngu Hinsegin daga, Bjartmar Þórðarson – leikari, söngvari og altmulig-maður og Ingileif Friðriksdóttir – fjölmiðla- og athafnakona.

Nánari upplýsingar um Gleðigöngupottinn

Nánari upplýsingar um Gleðigöngu Hinsegin daga


Viðurkenning fyrir bestu samfélagsskýrslu ársins


Landsbankinn hlaut hinn 5. júní sl. viðurkenningu fyrir bestu samfélagsskýrslu ársins 2018 en viðurkenningin er veitt af Festu, Stjórnvísi og Viðskiptaráði. Þetta var í fyrsta sinn sem viðurkenningin er veitt.

Í niðurstöðu dómnefndar segir m.a. að samfélagsskýrsla Landsbankans sé til fyrirmyndar og hljóti viðurkenningu sem besta samfélagsskýrslan árið 2018. „Af lestri hennar að ráða er ljóst að samfélagsstefna bankans er mótuð með víðtækri aðkomu starfsmanna og að samfélagsábyrgð er hluti af kjarnastarfsemi bankans. Í skýrslunni er fjallað ítarlega um valda mælikvarða og samanburð á milli ára sem sett er fram á myndrænan hátt. Lesandinn fær góða mynd af umfangi og þróun samfélagsábyrgðar, þeim markmiðum og meginverkefnum sem tekin eru til umfjöllunar,“ segir þar ennfremur. Framsetningin skýrslunnar er sögð einstaklega skýr og auðvelt fyrir almennan lesanda að fá yfirsýn yfir einstaka málaflokka en einnig heildaryfirsýn yfir samfélagsábyrgð hjá bankanum. Lesendur eigi einnig kost á að kafa dýpra í málefnin. Jafnvægi í skýrslunni sé gott og skýrslan sett fram með þeim hætti að til umfjöllunar eru einnig atriði sem hægt væri að líta á sem neikvæð en eru óhjákvæmilega hluti af rekstri félagsins.

Niðurstöðu dómnefndar í heild má lesa á vef Festu

Samfélagsskýrsla Landsbankans fyrir árið 2017


Landsbankinn tekur þátt í stofnun Samtaka um ábyrgar fjárfestingar

Samtök um ábyrgar fjárfestingar á Íslandi voru stofnuð 13. nóvember sl. Tilgangur samtakanna er að stuðla að aukinni þekkingu og umræðu um aðferðafræði sjálfbærra og ábyrgra fjárfestinga. Landsbankinn er eitt af 23 fyrirtækjum sem tók þátt í stofnun samtakanna.

Stofnaðilar Samtaka um ábyrgar fjárfestingar eru fjármálafyrirtæki, lífeyrissjóðir og tryggingafélög sem fjárfesta fyrir eigin reikning eða í umboði þriðja aðila með starfsemi á Íslandi og styðja tilgang samtakanna. Á meðal stofnaðila voru ellefu lífeyrissjóðir, fjórir bankar, þrjú tryggingafélög, fjögur rekstrarfélög verðbréfasjóða og eitt eignastýringarfyrirtæki.

Nánar um stofnun Samtaka um ábyrgar fjárfestingar


Samfélagsverkefni í deiglunni

Landsbankinn veitir 15 milljónir króna í samfélagsstyrki

Samfélagsstyrkir 2018
Styrkþegar ásamt Lilju B. Einarsdóttur bankastjóra Landsbankans og Guðrúnu Agnarsdóttur formanni dómnefndar.

Samfélagsstyrkjum að upphæð 15 milljónum króna var úthlutað úr Samfélagssjóði Landsbankans þriðjudaginn 18. desember sl. Alls hlutu 37 verkefni styrki að þessu sinni en verkefnin sem hlutu styrki eru afar fjölbreytt og gagnast fólki á öllum aldri og víða um land.

Þrjú verkefni hlutu styrk að fjárhæð 1 milljón króna, 14 verkefni hlutu 500.000 króna styrk og 20 verkefni fengu 250.000 króna styrk.

Rúmlega 300 umsóknir bárust sjóðnum að þessu sinni. Samfélagsstyrkjum Landsbankans er ætlað að styðja mannúðar- og líknarmál, menntamál, rannsóknir og vísindi, forvarnar- og æskulýðsstarf, sértæka útgáfustarfsemi og verkefni á sviðum menningar og lista.

Dómnefnd samfélagsstyrkja var að þessu sinni skipuð þeim Ármanni Jakobssyni, prófessor við Háskóla Íslands, Felix Bergssyni, leikara og Guðrúnu Agnarsdóttur, lækni, en hún var jafnframt formaður dómnefndar.

Nánar um styrkveitinguna

 

Tólf áhugaverð verkefni á sviði umhverfismála hlutu styrk

Styrkþegar umhverfisstyrkja 20178 width=
Umhverfisstyrkir Landsbankans voru afhentir 19. september. Hér má sjá styrkþega eða fulltrúa þeirra ásamt Dr. Guðrúnu Pétursdóttur, formanni dómnefndar, lengst t.v. og Hreiðari Bjarnasyni, framkvæmdastjóra Fjármála hjá Landsbankanum.

Endurhæfingarstöð fyrir slasaða ránfugla og framleiðsla á námsefni um matarsóun eru meðal þeirra tólf verkefna sem hlutu umhverfisstyrki úr Samfélagssjóði Landsbankans 19. september. Fjögur verkefni fengu 650 þúsund krónur hvert og átta verkefni 300 þúsund krónur, samtals fimm milljónir króna. Þetta er í áttunda sinn sem Landsbankinn veitir umhverfisstyrki úr Samfélagssjóði bankans og bárust um 70 umsóknir.

Umhverfisstyrkjum er ætlað að styðja við verkefni á sviði umhverfismála og náttúruverndar og dómnefnd leitast við að velja metnaðarfull verkefni sem hafa skýra þýðingu fyrir íslenska náttúru og vistkerfið.

Í dómnefnd sátu Dr. Brynhildur Davíðsdóttir, dósent í Umhverfis- og auðlindafræðum við Háskóla Íslands, Finnur Sveinsson, sérfræðingur í samfélagsábyrgð og Dr. Guðrún Pétursdóttir, forstöðumaður stofnunar Sæmundar fróða um sjálfbæra þróun við Háskóla Íslands, en hún var jafnframt formaður nefndarinnar.

Nánar um styrkveitinguna

Sjá fleiri myndir frá afhendingunni

 

Landsbankinn styrkir fimmtán framúrskarandi námsmenn

Námsstyrkir 2017

Landsbankinn úthlutaði námsstyrkjum til fimmtán námsmanna úr Samfélagssjóði bankans þann 14. júní sl. Styrkirnir voru nú veittir í 29. sinn. Heildarupphæð námsstyrkja nemur sex milljónum króna, sem er hæsta styrkveiting banka af þessu tagi á Íslandi. Alls bárust tæplega 500 umsóknir.

Veittir eru styrkir í fimm flokkum til framhaldsskólanema, iðn- og verknema, háskólanema, til háskólanema í framhaldsnámi og listnema. Landsbankinn er eini bankinn sem veitir sérstaka listnámsstyrki.

Dómnefndin leitaðist við að velja metnaðarfulla, framúrskarandi námsmenn með athyglisverða framtíðarsýn sem nefndin taldi líklega til að auðga íslenskt samfélag í framtíðinni. Einnig var litið til annarra atriða við valið, svo sem rannsókna og greinaskrifa, sjálfboðaliðastarfa, afreka í íþróttum og þátttöku í félagsstarfi, svo nokkuð sé nefnt.

Nánar um styrkveitinguna

 

Landsbankinn veitir 15 milljónir króna í samfélagsstyrki

Samfélagsstyrkir 2017
Styrkþegar ásamt dómnefnd og Helga Teit Helgasyni, framkvæmdastjóra Einstaklingssviðs Landsbankans.

Samfélagsstyrkjum að upphæð 15 milljónum króna var úthlutað úr Samfélagssjóði Landsbankans fimmtudaginn 14. desember sl. Að þessu sinni voru styrkþegar alls 38 en verkefnin eru afar fjölbreytt og gagnast fólki á öllum aldri og víða um land.

Þrjú verkefni hlutu styrk að fjárhæð 1 milljón króna, eitt hlaut 750.000 króna styrk, 11 verkefni hlutu 500.000 króna styrk og 23 verkefni fengu 250.000 króna styrk.

Rúmlega 300 umsóknir bárust sjóðnum að þessu sinni. Samfélagsstyrkjum Landsbankans er ætlað að styðja mannúðar- og líknarmál, menntamál, rannsóknir og vísindi, forvarnar- og æskulýðsstarf, sértæka útgáfustarfsemi og verkefni á sviðum menningar og lista.

Dómnefnd samfélagsstyrkja var að þessu sinni skipuð þeim Ármanni Jakobssyni, prófessor við Háskóla Íslands, Felix Bergssyni, leikara og Guðrúnu Agnarsdóttur, lækni, en hún var jafnframt formaður dómnefndar.

Nánar um styrkveitinguna

 

Samstarf

Landsbankinn á í samstarfi á sviði samfélagslegrar ábyrgðar bæði hér á landi og erlendis. Bankinn er einn stofnaðila Festu, miðstöðvar um samfélagslega ábyrgð fyrirtækja, aðili að UN Global Compact, einn af stofnendum norrænnar deildar innan UNEP FI og fylgir leiðbeiningarstaðlinum ISO 26000.

Nánar um samstarfið


Þetta tengist líka Samfélagsstefnu Landsbankans - með beinum eða óbeinum hætti