13. febrúar 2018

Framsetningu kröfugreiðslna í reikningsyfirlitum hefur nú verið breytt til fyrri vegar; þ.e.a.s. að þegar krafa er greidd með kostnaði, birtast nú tvær færslur í stað einnar. Önnur færslan inniheldur summu kostnaðarliða og hin summu höfuðstóls og seðilgjalds.

Eldri skilaboð nóvember 2017:

Við uppfærslu á innlána- og greiðslukerfum Reiknistofu bankanna og Landsbankans mun framsetning reikningsyfirlita breytast þann 20. nóvember. Breytingin hefur áhrif á hluta viðskiptavina bankans, m.a. þá sem notast við sjálfvirkar afstemmingar á reikningum í bókhaldskerfum.

Breytingin lýsir sér þannig að ef kostnaður hefur fallið á kröfuna, til dæmis af því að hún var greidd eftir eindaga, birtist aðeins ein úttektarfærsla á yfirliti bankareikninga, í stað tveggja áður (ein vegna kostnaðar, s.s. dráttarvaxta, og önnur vegna höfuðstóls og seðilgjalds). Þetta getur valdið því að hreyfingayfirlit stemmir ekki við útgreiðslubækur bókhaldskerfa.

Landsbankinn mun birta hugbúnaðaruppfærslu sem gerir fyrirtækjum auðveldara að gera ráð fyrir þessum breytingum í kerfum sínum. Þar til sú uppfærsla kemur munu viðskiptavinir sem verða fyrir áhrifum einungis geta séð sundurliðunina í netbankanum, bæði í Greiðsluleit og Greiddum bunkum. B2B fyrirspurnir á greiðslubunka breytast þó ekki, né heldur innlestur kröfugreiðslna.

Landsbankinn biðst innilegrar velvirðingar á óþægindum sem þessi breyting veldur. Nánari aðstoð og upplýsingar veitir Þjónustuver fyrirtækja í síma 410 5000 og í gegnum póst á netfangið fyrirtaeki@landsbankinn.is.

Viðskiptavinir sem greiða margar kröfur í einu og merkja við "Framkvæma sem eina úttektarfærslu" verða ekki fyrir áhrifum af þessum breytingum, þar sem kostnaðarliðir eru þegar innifaldir í slíkum úttektarfærslum.

Vegna innleiðingar á nýju innlána- og greiðslukerfi Reiknistofu bankanna og Landsbankans verða hinn 1. desember nk. gerðar breytingar á vaxtatímabili veltureikninga (höfuðbók 26). Vaxtatímabilið er nú frá 21. degi til 20. dags hvers mánaðar en verður framvegis einn almanaksmánuður, þ.e. frá fyrsta til síðasta dags hvers mánaðar. Fyrsta vaxtatímabilið eftir breytingarnar verður því 10 dögum lengra en venja er, þ.e. frá 21. október til 30. nóvember.

Breytingarnar leiða ekki til aukinna heildarútgjalda viðskiptavina en skuldfærsla útvaxta verður hærri en venja er til 1. desember nk. og hið sama á við um innlagnir vegna innvaxta.

Innvextir: Innlánsvextir eru gerðir upp einu sinni á ári. Vegna breytts vaxtatímabils verða innvextir vegna tímabilsins 21.-31. desember 2016 lagðir inn á reikninga viðskiptavina 1. desember 2017 í stað 1. janúar 2018.

Útvextir: Útvextir vegna vaxtatímabilsins 21. október til 30. nóvember 2017 verða gjaldfærðir á reikninga 1. desember nk.

Reikningsyfirlit viðskiptavina eru aðgengileg í netbankanum. Til þessa hefur bankinn einnig útbúið sérstakt rafrænt skjal sem hefur verið aðgengilegt í gegnum rafræn skjöl í netbönkum. Frá og með 17. nóvember verður því hætt og munu reikningsyfirlit framvegis eingöngu vera aðgengileg í netbankanum, undir flipanum "Yfirlit".

Undanfarin ár hefur verið unnið að því að birta reikningsyfirlit og hreyfingar á reikningum með skýrari hætti í netbönkunum og gefa þau nú skýrari mynd heldur en rafrænu skjölin gera.

Síðasta reikningsyfirlitið sem verður útbúið og aðgengilegt í rafrænum skjölum mun miðast við hreyfingar og stöðu í lok dags 17. nóvember. Yfirlitið er útbúið fyrir alla innláns- og veltureikninga viðskiptavina í tengslum við yfirfærslu í nýtt innlána- og greiðslukerfi Reiknistofu bankanna og Landsbankans.

Vegna breytinga á meðhöndlun greiðslna, við yfirfærslu í nýtt innlána- og greiðslukerfi, munu greiðslur á milli banka yfir 100 milljónum ekki skuldfærast af reikningum viðskiptavina þegar í stað heldur mun greiðslan skuldfærast þegar staðfesting bankans liggur fyrir.

Athugið þó að ráðstöfunarfjárhæð greiðslureiknings mun breytast sem greiðslunni nemur.

Með nýju innlána- og greiðslukerfi verða viðskiptavinir varir við færslur á reikningsyfirliti sem áður voru faldar. Gott dæmi er þegar greitt er fyrir eldsneyti með dælulyklum/kortum þá munu í sumum tilfellum birtast þrjár færslur á reikningsyfirliti en áður fyrr sá viðskiptavinur aðeins eina færslu. Dæmi: Þegar greitt er fyrir eldsneyti með dælulykli og valið er að "fylla". Þá er sótt hámarksheimild fyrir kortið t.d. 25.000 kr. síðan er dælt fyrir t.d. 10.000 kr. á reikningsyfirlitinu sést bakfærða heimildafærslan líka.

Bensínstöð -25.000 kr (heimild sótt á kortið)

Bakfærsla 25.000 kr (bakfærslan á heimildina)

Bensínstöð -10.000 kr (eldsneytið sem var í raun og veru keypt)

Hingað til hafa verið útbúnar sérstakar vaxtanótur með upplýsingum um greiðslu vaxta vegna yfirdráttar. Þessu hefur verið hætt. Gjaldfærsla á reikningsyfirliti er staðfesting á að vextirnir hafi verið greiddir.

Ekki eru útbúnar sérstakar kvittanir vegna gjaldfærslu á kostnaði við veltureikninga. Gjaldfærsla á reikningsyfirliti staðfestir að kostnaðurinn hafi verið greiddur.

Við innleiðingu á nýju innlána- og greiðslukerfi Landsbankans og Reiknistofu bankanna í nóvember 2017 varð sú breyting á uppgjöri á debetkortafærslum í posum að bókunardagur innborgunar á reikning kaupmanns hliðrast áfram um einn dag.

Ástæða fyrir þessu er sú að uppgjör á DK-kerfi (debetkortakerfi) Reiknistofu bankanna er keyrt seint um kvöld en þá er Landsbankinn kominn á nýjan bankadag.

Að svo stöddu mun þessi breytta virkni ekki hafa áhrif á vaxtaútreikning þar sem útreikningur vaxta mun miðast áfram við innsendingartíma eins og áður.